9. SWANGAH

SWANGAH ER KLÁRT TIL VOXBOTN 2026

Swangah verður av mongum mett at vera fyrsti veruligi rappbólkurin í Føroyum og hevur í nógv ár verið ein av teimum mest týðandi og vælumtóktu røddunum innan føroyskan hiphop. Bólkurin, sum hevur røtur í Svanga í Havn, hevur síðani byrjanina sett sítt sermerkta fingramerki á føroyska tónleikapallin við sínum beinraknu tekstum, sterku boðskapum og orkumiklu framførslum.

Síðani debutútgávuna Belials Synir í 2011 hevur Swangah vunnið fleiri heiðrar, m.a. sum Ársins Bólkur og Ársins Nýggi Bólkur, og bólkurin hevur eisini fingið heiðurin sum besta live-navn á føroyska tónleikapallinum.